បុរសម្នាក់ស្លាប់និងកូនស្រីអាយុ៨ឆ្នាំរបួសស្រាលខណៈកំពុងជិះម៉ូតូត្រូវរថយន្តបុក
01-January-2018 | ដោយ ពលមនសិការ
កណ្ដាល ៖ បុរសម្នាក់ស្លាប់យ៉ាងអណោចអធ័ម រីឯកូនស្រីរងរបួសស្រាលខណៈជិះម៉ូតូត្រូវបានរថយន្តមួយគ្រឿងបើកបុកពេញមួយទំហឹង។ ករណីខាងលើនេះបានកើតឡើងកាលពីវេលាម៉ោង១៤និង៣០នាទី ថ្ងៃទី៣០ ខែធ្នូ ឆ្នាំ២០១៧ ត្រង់ចំណុចភូមិត្រពាំងនប់ ឃុំក្រាំងម្កាក់ ស្រុកអង្គស្នួល ខេត្តកណ្ដាល ។
មន្ត្រីនគរបាលចរាចរណ៍ស្រុកអង្គស្នួលបានឲ្យដឹងថា ជនរងគ្រោះឈ្មោះ អ៊ែល ស៊ីមន ភេទប្រុស អាយុ៣២ឆ្នាំ ជនជាតិខ្មែរ មុខរបរ កម្មករសំណង់ មានទីលំនៅភូមិចំបក់ពណ្ណរាយ សង្កាត់បឹងធំ ខណ្ឌពោធិ៍សែនជ័យ រាជធានីភ្នំពេញ (ស្លាប់នៅនឹងកន្លែងកើតហេតុ) ជិះម៉ូតូមួយគ្រឿងម៉ាកហុងដាឌ្រីម ធុនសេ១២៥ ពណ៍ខ្មៅ ពាក់ស្លាកលេខភ្នំពេញ 1GE-6219 រួមដំណើរជាមួយកូនស្រីម្នាក់ឈ្មោះ យ៉ា យ៊ី ភេទស្រី អាយុ០៨ឆ្នាំ រងរបួសស្រាល។ ចំណែករថយន្តបង្កម៉ាកនីសសាន់ ធុនធំ ប្រភេទបែន ពណ៌សពាក់ស្លាកលេខ ចង្កូតស្ដាំ PP១៤៣៣ អ្នកបើកបរ មិនស្គាល់អត្តសញ្ញាណ (រត់គេចខ្លួនបាត់) ។
ប្រភពដដែលបន្តថា នៅមុនពេលកើតហេតុសាក្សីបានឃើញរថយន្តបង្កបើកក្នុងទិសដៅពីត្បូងទៅជើង លុះមកដល់ចំណុចកើតហេតុ រថយន្តបង្កបានបន្ថែមល្បឿនវ៉ាជែងរថយន្តមួយគ្រឿងដែលបើកស្របទិសគ្នានៅខាងមុខ តែវ៉ាមិនផុតក៏ជ្រុលចង្កូតទៅបុកម៉ូតូមួយគ្រឿងជិះក្នុងទិសដៅច្រាសគ្នាពេញមួយទំហឹង បណ្ដាលឲ្យជនរងគ្រោះជាអ្នកជិះម៉ូតូស្លាប់ភ្លាមៗនៅនឹងកន្លែងកើតហេតុ រីឯកូនស្រីអាយុ៨ឆ្នាំ រួមដំណើរជាមួយរងរបួសស្រាល ។ ចំណែកឯរថយន្តបានធ្លាក់ចូលក្នុងប្រឡាយទឹក អ្នកបើកបររត់គេចខ្លួនបាត់ស្រមោល ។
ប្រភពដដែលបានបន្តទៀតថា ក្រោយពីមានហេតុការណ៍កើតឡើង សមត្ថកិច្ចជំនាញបានចុះមកធ្វើការអន្តរាគមន៍ ពិនិត្យវាស់វែងកន្លែងកើតហេតុ រួចកសាងឯកសារដកហូតមធ្យោបាយពាក់ព័ន្ធទាំង២គ្រឿងយកទៅរក្សាទុកនៅអធិការដ្ឋាននគរបាលស្រុកដើម្បីចាត់ការតាមនីតិវិធីច្បាប់ ។ ដោយឡែកចំពោះសាកសពជនរងគ្រោះត្រូវបានសមត្ថកិច្ចប្រគល់ទៅឲ្យក្រុមគ្រួសារយកទៅចាត់ចែងធ្វើបុណ្យតាមប្រពៃណី ។
ករណីខាងលើនេះ គឺបណ្ដាលមកពីអ្នកបើកបររថយន្ត បើកខ្វះការប្រុងប្រយ័ត្ន មិនមើលស្ថានភាពផ្លូវដែលត្រូវវ៉ាជែង ទើបបានជាបុកម៉ូតូជនរងគ្រោះយ៉ាងដូច្នេះ ៕
ចំនួនអ្នកទស្សនា
- ថ្ងៃនេះ11351
- ម្សិលមិញ10851
- សប្តាហ៍នេះ77871
- ខែនេះ193021
- ឆ្នាំនេះ193021
- សរុប20635477